Bömmskes un Bömmelkes

Otto Pötter, een van de meerst liäsenen un besten Vertellers in de plattdüütschke Spraoke, hätt met sien´n nieët Bööksken dat Hiärt un de Iärsse van de Mönsterlänner druoppen. In „Bömmskes un Bömmelkes“ hätt Pötter op binaoh 160 Sieten üöwer seßtig Döönkes opschriewen, wat in´n wiede Mönsterland so passeert is aorre passeeren könn. In´t lesste van de Döönkes mäk he düetlick, wat son´n Döönken uutsäggen mott.
„Döönkes maaket alltiets froh un munter. Se sägget us: Laot de nich unnerkriegen! Drüm sitt us Ems- un Mönsterlänners dat Hiärt an´n rechten Pleck. Hör de Lüe hier män küeren, erst recht bi so´n Döönken. Ärgern päss dao nich bi. Well ´n Döönken drup häff, is sömms auk gued drup. Et is so: Döönkes doot guet! `n richtig schön Döönken is is ne kuorte Geschichte op Platt. Se vertellt, wat sick in usse Liäben so döt, wu et iäben so is!“ - Biëtter laot sick son´n Döönken nich verkläör´n.
Otto Pötters Bööksken to liäsen mäkt Spaß, man hätt de 159 Sieten gau düör. Mi hätt de Geschichte van „Nuul´n un Üölge“ (Nudeln und Öl) besunners guett gefallen, umdat dat Lädken van miene Moder jüst so uutstaffeert was. In düett Bööksken aowwer staoht nich blaoß Döönkes. Viëlle Riemsels gehört daoto jüst so äs de pössigen Teeknungen van Markus Pötter.

Otto Pötter, Aschendorff-Verlag Münster, 2012, 159 Seiten, ISBN 978-3-402-12962-3