Rund üm denn Kerktoorn

De Üöwerschrift van düet Böksken mäkt düetlik, wat drin steiht. Annette Katharina Winkelhorst hät in iähr diärdet Book Dönekes opschriewen, wu se rund üm den Kerktoorn van Wessem (Wessum) passeert sin müegt, wao de Autorin opwassen is. Annette Katharina Winkelhorst hät de Dönekes söws beliäwt un dat miärkt bi all de Geschichten, de jüst so äs in Wessem auk üöwerall päössig wäörn. Op de eene Siete geiht et üm dat Trügg-Gedenken op iähre Kinnertiet, aower auk niemodsken Kraom hät se opschriewen. Dao vötellt se met daipdenksken un manks auk schewen un drögen Humor, wu de Eierlikör in´t Mönsterland kuemmen is, äs dat op Tupperpartys so togeiht aor wu dat met Traditiaunen äs de „Hochtietsnööger“ (Hochzeitsbitter = Einlader) togong. Auk üöwer „Quasselstrippen“ hät se vötallt un üöwer de Bedütung van de Füërwiähr in so´n Düörpken“ äs Wessem. 31 Dönekes vötallt se in dat Böksken, een Glossar op de lessten Sieten mäkt dat Vöstaohn van de Wäöder lichter.

Annette Katharina Winkelhorst: Rund üm denn Kerktoorn, 120 Seiten, Agenda-Verlag Münster, ISBN 978-3-89688-641-5